DOMINGO 15 DE OCTUBRE
28º DOMINGO DEL T. ORDINARIO
MA’ALOB PÉEKSIL
Lela’ u xookil u Ma’alob Péeksil Yuumtsil Jesús dsíibta’an tumen San Mateo (22, 1-14)
Ti’ kíino’, Jesuse’ jo’op’ u ka’ansaj tu ka’a téen yéetel ket t’aano’obe’ ka tu ya’alaj ti’ le nukuch aj kíino’ob yéetel u nukuch máakilo’ob le kaajo’: U ajawil ka’ane’ bey jun tul ajaw tu beetaj jun p’éel kiimbesajil úuchik u dso’okol u beel u paal. Tu túuxtaj u palitsilo’ob u ti’al u t’aniko’ob le máaxo’ob a’ala’an ti’ob ka taako’obo’, ba’ale’ lelo’oba’ ma’ tu yóoltajo’ob taali’.
Tu túuxtaj u láak palitsilo’ob táan u ya’alik: A’ale’ex ti’ le máaxo’ob t’aano’obo’ dso’ok in nu’uktik le janalo’. Dso’ok in túuxtik kíimsbil in wakaxo’ob yéetel in polok ba’alche’ob, tuláakal nu’ukta’an; ko’otene’ex ti’ le dso’okol beelo’. Ba’ale le máaxo’ob t’aano’obo’ ma’ tu dsáajo’ob u yóolo’ob ti’obi’. Jun túul ti’ leti’obe’ j bin tu lu’umo’ob, u láake’ j bin tu koonolo’ob; u láako’obe’ tu machajo’ob u palitsilo’ob le ajawo’ ka tu ja’ajadso’ob tak ka tu kíimsajo’ob.
Le ajaw túuno’ jach kuuxilnaje’ ka tu túuxtaj u aj ba’atelo’ob u ti’al u kíimso’ob le j kíimsaj wíiniko’obo’ yéetel u ti’al u tóoko’ob u kaajalo’ob.
Ku dso’okole’ tu ya’alaj ti’ u palitsilo’ob: Tuláakal nu’ukta’an u ti’al le dso’okol beelo’, ba’ale’ le máaxo’ob t’aana’ano’obo’ ma’ táan u najmatiko’ob u taalo’ob. Xeene’ex túuun ti’ le noj bejo’obo’ ka a wa’ale’ex ti je’el máaxak ka a wile’exe’ ka talako’ob ti’ le dso’okol beelo’. Le palitsilo’obo’ jóoko’ob ti’ le bejo’obo’ ka tu much’kintajo’ob tuláakal le máaxo’ob tu yilajo’obo’ kasa’ano’ob yéetel utso’ob; bey túuno’ le najo’ j chu’up yéetel máako’ob.
Le ajaw túuno’ j ook u yil le máaxo’ob t’a’ano’obo’, ka tu yilaj jun túul máak ma’ u búukintma u nookil u ti’al jun p’éel dso’okol beeli’, ka tu ya’alaj ti’: In wéet xiibil ¿Bix ookikech waye’ wa ma’ a búukintma u nookil u ti’al jun p’éel dso’okol beeli’? Ba’ale’ le máako’ mix ba’al tu ya’alaj. Le ajaw túuno’ tu ya’alaj ti’ le máaxo’ob táan óoltiko’ob le mayakche’obo’: Kaxe’ex u kabo’ob yéetel u yooko’obe’ ka a jóokese’ex tu éekjoche’enil táankab, tu’ux bíin úuchuk okol yéetel jach’ koj.
Tumen ya’ab le máaxo’ob t’ana’ano’obo’ ba’ale’ jun p’íit le máaxo’ob yéeya’ano’obo’.
Le la’ U taán Yuumtsil
- / Nojbe’enil ti’ tech Yuumtsil Jesús.